နောက်ခံသမိုင်းကြောင်း

ပြည်ထောင်စုသမ္မတမြန်မာနိုင်ငံတော်အစိုးရ၊ သိပ္ပံနှင့်နည်းပညာဝန်ကြီးဌာနအောက်ရှိ နည်းပညာ၊ သက်မွေးပညာနှင့် လေ့ကျင့်ရေးဦးစီးဌာနနှင့် Moattama Gas Transportation Co., Ltd (ရတနာစီမံကိန်း) တို့ ပူးပေါင်း၍ အောက်ဖော်ပြပါ ရည်ရွယ်ချက်များဖြင့် ရတနာဂဟေဆက်နည်းပညာသင်တန်းကျောင်း (အောင်ဆန်း) ကို ၂၀၁၆ခုနှစ်၊ နိုဝင်ဘာလ (၁၅) ရက်နေ့တွင် စတင်တည်ထောင်ဖွင့်လှစ်ခဲ့ပါသည်။

• နိုင်ငံသားတိုင်း သက်မွေးပညာတစ်ခုဖြစ်သည့် ဂဟေဆက်ပညာကို  စနစ်တကျ သင်ယူနိုင်မည့် အခွင့်အလမ်းရရှိစေရန်

• နိုင်ငံသားတို့၏ အလုပ်အကိုင်ရရှိမှုနှင့် တစ်ဦးချင်းဝင်ငွေ မြင့်မားရေးကို ဂဟေဆက်နည်းပညာဖြင့် အထောက်အကူ ဖြစ်စေရန်

• ဂဟေဆက်ပညာရပ်အား စနစ်တကျနှင့် ဘေးအန္တရာယ်ကင်းရှင်းစွာ ဆောင်ရွက်နိုင်စေရန်

သင်တန်း‌ကျောင်းဖွင့်လှစ်သည့်နေ့မှ စတင်၍ ပြင်ပလုပ်ငန်းခွင်နှင့် သင့်‌လျော်ထိရောက်စေသည့် ဂဟေဆက်ကာလတိုသင်တန်းများကို အဆက်မပြတ်  ဖွင့်လှစ်  သင်ကြား‌ပေးလျက်ရှိပါသည်။

တည်နေရာ၊ အကျယ်အဝန်း နှင့် အဆောက်အဦများ

အောက်မင်္ဂလာဒုံလမ်းမကြီး၊ စဉ့်ငူရပ်ကွက်၊ အင်းစိန်မြို့နယ်၊ ရန်ကုန်တိုင်းဒေသကြီးတွင်တည်ရှိပါသည်။ အရှေ့ဘက်၊ အနောက်ဘက်၊ မြောက်ဘက် တို့တွင် ဂျပန်-မြန်မာအောင်ဆန်းသက်မွေးပညာသင်တန်းကျောင်း (ယခင်စက်မှုလက်မှု အထက်တန်းကျောင်း (အောင်ဆန်း))၊ တောင်ဘက်တွင် ပတ်ဝန်းကျင်သန့်ရှင်းရေးဌာနတို့ ရှိပါသည်။

ကျောင်း၏အကျယ်အဝန်းမှာ (၀.၈၇ ဧကခန့်) ကျယ်ဝန်းပါသည်။